Poslovne vesti - Makedonija

Македонската дијаспора ќе инвестира 15 милиони долари во Македонија

Македонската дијаспора ќе инвестира 15 милиони долари во Македонија.

Средствата ќе се пласираат преку новооформениот фонд СЕАФ Македонија 1, што го најавија учесниците на Глобалниот инвестициски форум во Охрид. Роберт Арсов, потпретседател на Македонија 2025, посочи дека има многу Македонци кои можат да вложуваат во фондот. Минималниот износ е 500 илјади долари од инвеститор.

Фондот ќе го води Хубертус Јан ван дер Варт, извршен директор на СЕАФ, кој потенцира дека на почетокот ќе се поддржат 10 до 14 компании, бизниси од областа на земјоделството, фармацијата, едукацијата и тренингот.

- Сега е вистинско време за инвестирање во Македонија, порача претседателот на Македонија 2025, посочувајќи дека целта на организацијата е да се зголеми вклученоста на дијаспората, да се претстави Македонија како привлечна за инвестирање и да им се помогне на локалните компании. Сето тоа со цел развој на Македонија, да стане подобро место за живење.

Според Зоран Мартиновски, член на Македонија 2025, нема подобро место за живеење од дома и затоа треба да се работи на развој на земјата. Живко Мукаетов од Алкалоид" укажа на потребата од заедничка работа на сите за раст на македонската економија, додека Минчо Јорданов, исто така член на Македонија 2025, нагласи дека Самитот ќе придонесе за зацврстување на мостот со дијаспората.